Grahovac: O članstvu u NATO da odluče građani
1 min read
Odluku o članstvu Crne Gore u NATO trebalo bi da donesu građani, kazao je analitičar geopolitike i general avijacije u penziji Blagoje Grahovac, navodeći da je trenutno nedovoljna podrška građana za ulazak u Alijansu.
Grahovac smatra da bi o ulasku Crne Gore u NATO trebalo odlučiti na referendumu, ali ne zbog NATO-a, nego da bi se militantno stanje duha građana smanjilo.
On je za Blic Crna Gora kazao da građani moraju osjetiti da oni odlučuju o članstvu.
„To je suština. Ako čak i ne uspije referendum prvi put, uspjeće drugi, treći ili četvrti. Ali, građani moraju prihvatiti potrebu za članstvom u NATO. Ako kažemo da je građanin nosilac suvereniteta što je najveća moguća kategorija s obzirom na to da se ovdje radi o prenošenju dijela suvereniteta Crne Gore na drugoga. I zato treba građane učiniti odgovornima i dati im priznanje da oni odlučuju o suverenitetu“, rekao je Grahovac.
On kaže da je suština upravo u tome da građani osjete da se oni pitaju o suverenitetu, jer će tada znati i da ga brane.
