Korona za nevjernike

Piše: Goran Šćekić

Kad nemaš vjeru, onda nemaš istoriju, nemaš Slavu i na kraju nemaš ni Boga.
„Sila Boga ne moli’.
To je osnovna filozofija života vladajućeg režima u Crnoj Gori.
30 godina uzduž i poprijeko, haraju Crnom Gorom. Zaplijeniše i prodaše sve što se moglo prodati. Kad je sve ostalo pusto i prazno, režimski nevjernici krenuše na Crkvu. Đe krenuše tu se polomiše.

Ovako je režim došao do samog kraja i svog prvog nenadanog pada. A onda se desilo nešto u šta niko vjerovao nije.
Nešto što je iznenadilo čak i režimske nevjernike.
Pojavila se korona, korona spasa, korona kojoj se nikad nisu molili.
Od tada se sve promijenilo. Režimski nevjernici postadoše vjernici. Sad vjeruju koroni. Njoj se mole i nju slave.
Korona je njihova ikona pred kojom svake večeri kleče.
„U ime Mila i sina i svete korone“.
Dan kad se pojavila korona, prihvatili su kao svoju Slavu, koja nikad neće biti posna.
Njima ne miriše tamjan već jagnjeće pečenje. Treba jesti što drugi nemaju. Korona će biti zaštitnica režima i njihove poharane imovine.
Ali Korona je prolazna. Ona dođe i prođe, blijedi i nestaje.
Narod pamti i zapamti. Zna đe je krenuo i đe je stao. Litije će biti početak kraja vjernicima korone.

-„Tvrda vjera, Crkva čudnovata
– Ne slomi je al zube polomi
– Krenu režim gdje mu mjesto nije
– Ubiće ga narod i Litije“.