Duboki naklon

Šetam neki dan po kiši što pada u nastavcima, i na uglu ulice presretne me poznanik, jedan visok koliko i izbjegni-me-tip, u hodu razbacan, uvijek (krajnje) neozbiljno odjeven (kao što je to, obično, slučaj sa novinarima, ali to nije zvanije i ovoga, bar za sad nije), i već sa upadljive daljine poče govoriti zatvarajući i otresajući kišobran, nešto o (nekom) Sibinu, i kao usput me pitajući, onako u njegovom stilu:

Je li, da i ti nisi Sibin?! – i na pitanje okači blesavi kez.

Gledam ga između svih tih kišnih kapi, pa ću na to:

Čuo sam da je taj vražiji Sibin ime jedne amaterske organizacije koja (kao) o politici i koječemu zbraja šale o vlastitom trošku. Tu nije riječ o jednom, već o par okorelih anonimusa – odgovaram, kao da sam upućen, dok, zaista, nemam pojma o čemu govorim, a i ne tiče me se.

Vjeruj mi da sam i sam govorio – nastavi sa kratkim pogledom ka nebu koje nije podržavalo ideju da zatvori (bar privremeno) kišobran – da se pod imenom Sibin estetski i, prije svega, usputno krije, par budala koje fetišistički uživaju poštenim ljudima od imena kovati nadimke. Imao sam iz kože iskočiti kad sam skoro u jednoj kolumni pročitao da je Škrelju nazvao – spekuljativnu um.

Jeste – rekoh – i Aleksandru V. – poslanica iz šešira.

Andrija Nikolić je – promašeni dubler.

Bečić – ničiji a nepodijeljeni.

Ranko – hodajuća, domoljubna bista.

Brajović – independent Ivo.

Lekić – nec-aut.

Goran – Dantedanilović.

Marković – dugouško.

Milo – britvulin.

Da, da – reče –  i tako redom, sve do gospođe Marte Š., koja je, ako se ne varam, prepoznata kao izvjesna femme-gorka. Tu je, svakako, i Cungu&Co., kao i Tarzan u patikama i Migo gramaturg – nastavi sa paklenim spiskom, onako vidno uznemiren, te je dva puta i neprimjetivši otvorio i zatvorio kišobran, usput uprazno mlatarajući njime.

Kako bih donekle smirio situaciju jer je kiša znatno pojačavala, naivno rekoh:

Ma, to je sve tralalajka, ja što ti kažem. Koga briga za svu tu cirkusijadu! DPS end malograđanska opozicija bogomdani su za eksperimentisanje pri pravljenju profila; ne smijem ni da zamislim šta bi im tek legendarni CORAX priredio, i kakav bi to tek kalendar za dvijehiljadeosamnaestu bio… To su – ravnodušno dodadoh – ionako – ofrlje likovi.

***

U novoj godini, svima ponaosob želim mnogo uspjeha pri daljem radu.

Vaš,

Sibin